नारी ले नर कमसल हे
राजनांदगांव। मोखला से जनता से रिश्ता के पाठक रोशन साहू ने कविता ई-मेल किया हैं.
ये जग के मरजाद खातिर,आंखी गंग जमुन जल हे।
धरती जस धीर धरईया नारी,कइसे कहिबे अबल हे।।
जस-जस नारी उमर पहाथे,ममता के मूरत बन जाथे।
दया मया बर नर मनखे,नारी ले हीनहर कमसल हे।।
जस-जस मनखे उमर पहाथे,अपने दुख मा घूर जाथे।
नारी हिरदे गहरी सगुरिया,कतरो पीरा कहां पूर पाथे।।
तियाग बानी बेवहार ले,सबो जुग मा मनखे हारे हे।
हारे मनखे फेर सिरतो हारिस ,जब नारी ला तज जाथे ।।
घर ला कभू तजय नही नारी,बहिरी ईश्वर ला पाये बर।
जब-जब अंतस पैठिस नारी,अगास जोहे परघाये बर ।।
बहिरी रद्दा गजब सरल,बड़ अलकर अंतस भितर हे।
बूंद कहूं मिलगे,मनखे निकलगे,अपने सोर उड़ाये बर।।
नर धंधाय गरब के मेकरा जाला मा,नारी धरे गरभ हे ।
जिनगी के जम्मो उछाह समाये ,जग के सबो परब हे।।
तभो ले काबर पखरा बनथे,धरती समाथे अउ जरथे।
नारी ले जीवन के सबो सवांगा,जीवन के सबो मरम हे।।
